Дворот на основното училиште „Љубен Лапе“ во Аеродром од денеска го красат 200 нови садници поставени во вид на жива ограда. Освен естетската тие ќе имаат и еколошка функција бидејќи ќе ги намалуваат штетните влијанија од сообраќајот од улицата „Васко Карангелески“ со која се граничи ова училиште.
Убаво е да се види дека се размислува и делува во правец на зелен и поздрав Аеродром. Но, за жал во истата оваа општина блиску од училиштето и во овој период се сечат големи и раскошни дрвја. Се продолжи и со уривање на стари објекти со цел да се изградат нови висококатници.
Едноставно, борбата на зеленилото и бетонот продолжува. Кој ќе победи многу зависи од сегашниот градоначалник и општинската администрација. Зависеше и од претходниот градоначалник и Советот кога се правеа многу ДУП-ови…
Борбата ќе има уште многу рунди, засега во многу делови од Аеродром зеленилото веќе сериозно губи, а некаде е и нокаутирано.
Инаку, денешните садници се донација од Прокредит банка во рамките на нивната општествено -одговорно кампања „Се грижам, дејствувам, менувам“.