Децата кои имаат потреба, ќе добиваат бесплатни психолошки, логопедски и дефектолошки третмани во Кисела Вода. Градоначалникот Орце Ѓорѓиевски на свој профил на Фејсбук објави дека креираат социјални мерки и услуги во интерес на граѓаните и дека врвен приоритет во работењето им се најмладите жители.
-Работејќи кон создавање подобри услови за живеење и активно вклучување на сите граѓани во заедницата, од денес во Припор функционира Центар за психофизичко здравје кој нуди логопедско-дефектолошки и психолошки услуги. Наша заедничка цел е да им овозможиме поголема достапност и полесен пристап на услугата на жителите на општината и да им помогнеме на семејствата во социјален ризик, напиша Ѓорѓиевски.
Градоначалникот додава дека жителите на општина Кисела Вода кои согласно Закон за социјална заштита спаѓаат во категоријата на ранливи семејства и имаат потреба од оваа услуга ќе може да се обратат во новоотворениот центар во Припор.
-За сите останати наши жители, обезбеден е попуст. Соработката со Центарот за психофизичко здравје ,,Гаспар” продолжува и понатаму како на локално така и на национално ниво и наскоро ќе бидат промовирани и нови услуги кои им се потребни на нашите жители, се вели во објавата на градоначалникот.
