На двојните избори на 8 мај граѓаните само еднаш ќе имаат право да влезат на избирачкото место за да се гласа на вториот круг на претседателските и на парламентарните избори. Но, претходно, секој граѓанин ќе треба да ја соопшти својата намера.
-Дали ќе гласате само за претседателските, само парламентарните или и за двата вида избори, е прашање со кое ќе биде пречекан секој гласач на 8-ми мај од член на избирачките одбори, одлучи денеска Државната изборна комисија.
Прашањето ќе може да го поставуваат членовите на избирачките одбори кои се задолжени за биометриска идентификација.
На тој начин, освен, како што соопшти Комисијата, потранспарентна работа на ИО, ќе се има и јасен увид за излезноста на двата паралелни процеса.
Втора шанса да влезат на избирачакото место граѓаните нема да имаат.
-Едно лице од избирачкиот одбор кое ракува со уредот за биометриска документација најпрво задолжително да ги праша граѓаните за кој вид на избори сакаат да гласаат, дали за парламентарни, дали за претседателски, или за двата вида на избори и тоа на соодветен начин да го нотифицира во уредот за биометриска идентификација. После што по вторпат во текот на денот, бидејќи им е дадено првото на избор, граѓаните нема да можат повторно да доаѓаат на гласачкото место, образложи членот на ДИК, Борис Кондарко.
За да нема застој во гласањето на двојните избори, ДИК одлучи и бројот на членови на избирачки одбори да се зголеми од 5 на 7. По едно лице од избирачките одбори ќе биде задолжено за проверка на граѓаните во избирачките списоци, посебно за тој за гласачите за претседателските, посебно за парламентарните избори. Исто така по еден член од изборните комисии ќе биде задолжен за издавање само на гласачките ливчиња за граѓаните кои ќе гласаат за претседателските, друго за оние за гласачките ливчиња за парламентарните или и за двете. Седмото лице од гласачкиот одбор е одговорно за обезбедување на тајноста на гласањето зад параванот.
