Општина Кисела Вода се уште е далеку од постапката да распише изработка на Детален урбанистички план за локалитетот Расадник каде што неодамна избувна голем пожар.
Градоначалникот на Кисела Вода и претседател на ЗЕЛС, во своето гостување за Радио Слободна Европа, запрашан за големиот пожар што избувна во населбата Расадник изјави дека на опожареното место нема да се гради ништо, иако од кујната на опозициските партии се сервираше нешто друго.
Како што кажа Ѓорѓиевски, сопрен е спорниот ДУП за Расадник кој предвидуваше 99 згради и беше донесен од неговиот претходник, а за истата населба е распишан Меѓународен конкурс кој е прв во Македонија после Кензо Танге.
– По големиот пожар во Расадник, како што изјавив и за медиумите,но го изнесов тоа и на мојот фејсбук профил, нема да се гради ништо. За да се гради во Расадник, треба да се донесе Детален урбанистички план (ДУП). За разлика од минатото и концептот од минатото, каде што во Расадник требаше да се изврши груба бетонизација од мојот предходник, од редовите на Социал-демократскиот сојуз, тоа е бившиот градоначалник на Кисела Вода, мојот концепт, кој што го понудив беше поинаков, граѓаните го поддржа и тој концепт станува пракса. Почнува во пракса да се реализира, а тоа значи во првиот дел од своето ветување, јас кажав и заврши успешно објавување и избор на меѓународен конкурс за идејно решение за Расадник. По завршената постапка треба допрва да се нарача изработка на ДУП. Согласно финансиите на општината, кога ќе бидеме во можност, ќе извршиме постапка во која што ќе биде нарачан Детален урбанистички план, но во моментов сме далеку од таа постапка, рече тој.
