Голема зимска бура денеска го зафати горниот дел од Среден Запад на САД со силни ветрови и снег, што предизвика затворање на стотици училишта и големи проблеми по патиштата и авионскиот сообраќај.
Зимско временско предупредување беше издадено за повеќе од 50 милиони Американци утринава, бидејќи бурата се движеше низ западните и северните делови на САД, а потоа кон исток, објави Ројтерс.
Утре во текот на денот на места се очекуваат и до 60 сантиметри снег и брзина на ветер до 97 километри на час, соопшти Националната метеоролошка служба.
Невремето ја погоди и Калифорнија и донесе мешавина од снег и лапавица на исток, вклучувајќи ја и Нова Англија, каде синоптичарите ги предупредија возачите да внимаваат на лизгави патишта.
Патиштата покриени со снег го направија патувањето опасно во горниот дел на Среден Запад, а далноводите покриени со мраз и соборените дрвја може да доведат до прекин на електричната енергија доцна денес и утре, соопшти Центарот за предвидување на времето на метеоролошката служба во Колеџ Парк.
