Девет граѓански организации и независни иницијативи утрово доставија 18 прашања до политичките парртии што ќе учествуваат на парламентарните избори, на кои, како што велат, наместо флоскули и демагогија, очекуваат конкретни одговори со рокови, буџет и одговорни институции и личности.
-Скоро 70 проценти од законите се спроведуваат на локално ниво, во нашите општини. На прагот сме на парламентарни избори, а одлуките кои следните парламентарци ќе ги носат, директно ќе влијаат и на политиката на локално ниво. Ние на овие избори не учествуваме директно, но и ние и останатите граѓани гласаме. И сакаме информирано да гласаме, велат од О2 Иницијатива.
Прашањата на организациите се поврзани со загадувањето, урбанизмот, владеењето на правото и квалитетот на животот. Вклучените организации се Граѓанската иницијатива Шанса за Центар – Скопје, О2 Иницијатива, Граѓанска иницијатива Зелен хуман град – Скопје, Граѓанска иницијатива Зелените од Гази Баба – Скопје, Граѓанска иницијатива Независни за Карпош – За заштита на Карпош- Скопје , Граѓанска иницијатива Заедно за промена – Скопје, Граѓанска иницијатива Стига е – Струмица, Босилово, Ново Село, Граѓанска иницијатива За Расадник на можности, за хуман живот во Кисела Вода – Скопје и Граѓанската иницијатива Грин.Орг – Кочани.
-Нашите заложби се јасни: транспарентно, чесно, законито и правично општество за сите, политики кои ги штитат граѓанинот и јавниот интерес, обезбедуваат и стимулираат активно граѓанско вклучување и обезбедуваат здрава животна средина и подеднакви квалитетни услуги за сите граѓани низ државата, велат здружените организации и иницијативи.
Нивните прашања до политичките партии – учесници на изборите, на кои велат дека очекуваат одговор до 2 мај, се:
Загадување:
о Што конкретно ќе преземете во текот на следната година, во следните 3 и 5 години за бројката од 5.600 жртви од загадувањето да не расте, туку да се намалува и дали ги знаете економските последици од загадувањето и како ќе се справувате со нив?
о Кога ќе почнете и во кој рок ќе го завршите префрлувањето на 700 јавни објекти од мазут и нафта на незагадувачки енергенси за загревање и така ќе го спречите континуираното труење на граѓаните?
о Кои се вашите конкретни чекори за справување со отпадот во кој се гуши државата и како ќе се санкционираат општините коишто не се справуваат со отпадот?
о Дали имате јасен план за организирање на незагадувачки јавен транспорт во Скопје и поголемите градови?
о Дали ќе го „одмрзнете“ проектот за обележување на старите загадувачки автомобили, и нивно скалесто отстранување од сообраќај во денови на зголемено аерозагадување?
о Како ќе овозможите конечно да се спроведува Законот за бучава кој предвидува и со него предвидената државна мониторинг мрежа за мерење на бучава и како ќе воспоставите ефикасен систем за контрола и санкционирање?
о Кој е вашиот став за рудници во земјоделски региони, во близина на населени места и заштитени подрачја, како и за малите хидроцентрали по реките?
о Каде и колку пречистителни станици за отпадни води ќе изградите во овој мандат?
о Кога ќе направите фонд за животна средина од сите еколошки такси во државата?
Урбанизам:
о Кога ќе го смените Законот за градежно земјиште со кој се дозволува оној кој има 30% да може да откупи 70% од градежна парцела со државно земјиште? Како ќе спречите приватизација на атрактивно државно земјиште по багателни цени?
о Кога и како ќе ја запрете легализацијата на дивоградбите и како ќе се справите со постоечките дивоградби и дивеењето на инвеститорскиот урбанизам?
о Која е вашата стратегија во неколку конкретни чекори да ја прекинете финансиската зависност на општините само од комуналии и издавање нови градежни дозволи?
о Што ќе правите со проектот Скопје 2014?
Владеење на право:
о Како ќе овозможите полесно да се спроведуваат локални референдуми и облици на непосредно изјаснување на граѓаните и следење на политиките?
о Дали ќе поддржите јавна расправа во Собранието за Изборниот законик по изборите?
Сообраќај:
о Како ќе го намалите бројот на жртви во сообраќајот и сообраќајниот хаос?
о Како ќе го вратите комуналниот ред во општините?
о Дали имате јасен план за справување со кучињата скитници на национално ниво?
