Сојузот на средношколци денеска ја поздрави одлуката на Владата за започнување на новата учебна година со физичко присуство под протоколи за заштита на здравјето.
– Задоволни сме од донесената одлука, бидејќи ние и минатата учебна година се залагавме училиштата да останат отворени. Се надеваме дека сите заеднички со почитување на мерките за заштита и протоколите ќе придонесеме за настава во училишни клупи колку што е можно подолго, изјавил Лука Павиќевиќ, претседател на Сојузот на средношколците, според соопштението што го објави МОН.
Цароовска апелирала до средношколците и наставниот кадар доследно да ги почитуваат мерките за заштита и да се придржуваат на протоколите, бидејќи само така училиштата може подолго да останат отворени.
Нито од кажаното не е спорно, освен дека средбата на средношколците и на Царовска се одржала онлајн, а за десетина дена се очекува стотици ученици да влезат во училиштата под посебни протоколи, во услови кога бројките на заразени се повеќекратно повисоки од лани ова време, а состојбата и покрај тоа се оценува како добра.
Владата вчера го прифати предлогот за настава со физичко присуство за сите ученици од основното и средното образование, освен за извесни исклучоци.
МОН исто така потсети дека доколку се влоши епидемиолошката состојба има уште две сценарија за настава, хибриден и онлајн.
