Албанскиот Институтот за статистика, ИНСТАТ го одби барањето на единствената македонска партија во Албанија, Македонска алијанса за европска интеграција, МАЕИ, пописот на населението да се продолжи и за подрачјето на Мала Преспа. Ефтим Митревски, кој го достави барањето до ИНСТАТ, смета дека доколку би било одобрено продолжување на пописот и во ова подрачје, населено само со Македонци, ќе овозможело поголем процент на опфатеност.
– Добивме негативен одговор на барање до ИНСТАТ, со образложение дека продолжувањето на пописот на населението и домаќинствата важи само за планинските населени места и оние погодени од катастрофалниот земјотрес, што земјата ја погоди на 26 ноември 20019 година. Барањето го доставивме од причина што добар дел од жителите се сезонски работници во Македонија и Грција, поради што, во предвидениот рок не се контактирани од попишувачите, изјави за МИА, Ефтим Митрески, потпретседател на партијата.
Пописот во Албанија почна на 18 септември и требаше да заврши на 30 октомври, но ИНСТАТ неколку дена пред крајот соопшти дека истиот продолжува до 15 ноември, бидејќи „околу 3 отсто од подрачјата, главно планински, на целата територија на Република Албанија сè уште не се попишани“.
Податоците собрани на терен, од оваа значајна статистичка операција ќе бидат обработени, анализирани и објавени во форма на официјална статистика во јуни идната година.
Ова е 12. попис по ред на населението во историјата на Албанија, првиот е спроведен во 1923 година, а последниот во 2011 година.
