Среќен крај имаше исчезнувањето на 23-годишниот скијач, по кој од вчера беше спроведена огромна акција за негово пронаоѓање во ски-центарот Сели во северна Грција, а денеска, нешто помалку од 24 часа од исчезнувањето беше пронајден жив и според првичните информации, во добра здравствена состојба.
Младиот скијач веројатно се дезориентирал и се оддалечил од ски-центарот, а нашол засолниште во шумска караула што се наоѓа на поголема оддалеченост и вон границите на ски центарот.
Според грчките медиуми, 23-годишниот е искусен скијач, падобранец и обучен да преживее во тешки услови.
По пронаоѓањето, се очекува превентивно да биде префрлен во болница, а според првичните информации е во добра здравствена состојба.
Скијачот исчезна вчера, откако во ски-центарот се оддалечил од пријателите во друга насока и му се загубила трагата, последен пат го виделе околу 14 часот, го чекале до 16 часот и откако не дошол на договореното место, а мобилниот му бил исклучен, ги информирале надлежните.
Веднаш започнала акција за пронаоѓање на 23-годишниот со учество на спасувачки тим на противпожарната служба со 35 пожарникари и 15 возила, специјално возило, планинарски спасувачки екипи, специјални единици, спасувачко куче, хеликоптер, полицајци, термички камери, како и волонтери.
Пронајден беше од група пожарникари, нешто помалку од 24 часа откако му се загуби трагата, околу 13 часот по локално време.
