Во Реонскиот центар во скопската општина Аеродром нема да се градат три станбени згради кои беа предвидени со досегашниот урбанистички план. Наместо згради и асфалт околу нив просторот ќе биде уредено зеленило со површина од 13.200 метри квадратни.

Ова е направено откако општинскиот Совет вчера донесе одлука да избрише уште три градежни маркици во овој дел од општината. Иницијативата беше покрената од страна на градоначалникот Тимчо Муцунски и ова не е прво бришење на градежни маркички откако тој застана на чело на општината.

–Продолжуваме со бришење на градежните маркици ширум нашата општина! На Аеродром му е потребна хумана урбанизација! Задоволен сум што Советот ја изгласа оваа иницијатива која е во интерес на аеродромци. Ставаме акцент на зеленилото и хуманата урбанизација. Преку одговорно работење придонесуваме за што повеќе зелени површини во нашата општина, истакна градоначалникот Муцунски.