Војните за шверц на дрога предизвикаа петкратно зголемување на стапката на убиства за шест години во Еквадор. Гвајакил во Еквадор сега е еден од најопасните градови во светот. Некогаш беше една од најбезбедните земји во Латинска Америка, релативно невознемирена од насилството на нејзините соседи. Сега Еквадор е на милост и немилост на криминалниот бран управуван од нарко-картели, локални одметници и меѓународни гангстери, пишува „Тајмс“.
Од 2016 година, стапката на убиства е зголемена за пет пати. Пацифичкиот град Гвајакил, некогаш популарен меѓу пензионерите поради своите живописни плоштади и одличната здравствена заштита, сега се рангира заедно со Хуарез во Мексико и Порт-о-Пренс на Хаити на листата на најопасните градови во светот. Провинцијата Есмералдас, која се граничи со Колумбија, имаше 82 убиства на 100.000 луѓе минатата година, двојно повеќе отколку во 2021 година. Во Велика Британија бројката е 1,1 на 100.000, пишува „Тајмс“.
Некои од најмоќните организации кои управуваат со дрога во Гвајакил се раководени од Албанци. Едниот, познат како кланот „Фаруку“, беше разбиен од шпанската полиција минатиот април. Полицајците уапсија 17 лица обвинети за транспорт на два тони кокаин, скриен во замрзната риба, од Гвајакил.
Се смета дека во градот се населени околу 3.000 Албанци. Земјата е привлечна за бандите од Балканот делумно затоа што, до 2020 година, на Албанците и на другите источноевропски граѓани не им требаа визи за влез; би можеле да пристигнат како туристи и да го надминат престојот. Друга предност што ја открија е тоа што економијата е доларилизирана, што го олеснува перењето пари. А лажните документи се екстремно лесно да се добијат, пишува „Тајмс“.
– Еквадор стана жариште за албанските шверцери од ниско и средно ниво, од кои многумина се соочуваат со кривични обвиненија и се обидуваат да ги рестартираат своите кариери надвор од Европа, истакнаа минатата година од „Инсајт Крим“, истражувачка новинска организација, која се фокусира на организираниот криминал.
Во знак на успехот на европските шверцери на дрога во Еквадор, во последниве години има забележителна промена на дестинацијата на кокаинот што се шверцува од земјата. Во 2019 година, само 9 отсто од запленетата дрога биле наменети за Европа. До 2021 година оваа бројка се зголеми на 30 проценти.
Полицијата открила и зголемен број убиства во стилот на италијанската мафија во Гвајакил. Во јануари минатата година, во едно од најозлогласените убиства во земјата, Ергис Даши, шеф на албански картел, беше застрелан пред очите на десетици сведоци во ресторан во градот.
