Сосема заслужено, македонските ракометни репрезентативци вечерва по шести пат се пласираа на Светско првенство откако во Скопје ја победија репрезентацијата на Чешка со 27 : 25. Првиот натпревар во Злин, Чешка заврши нерешено 24:24. Бараж-натпреварот за пласман на СП 2023 година во Шведска и Полска беше неизвесен до самиот крај иако ракометарите на Македонија во најголем дел од мечот имаа предност која во еден момент достигна и четири гола разлика.
Решавачки беа последните пет минути од натпреварот во кои Чешка се доближи до минус еден гол (25-24) после нашите плус три минута претходно. Но, во игра на нерви, двајцата најдобри стрелци Филип Талевски и Филип Кузмановски со два гола го решија прашањето на победникот.
Македонија по стартот на мечот се најде во негатива од 2-4, а после првата голема серија со 5-0 дојде до водство од три разлика и постојано го контролираше мечот, држејќи го противникот на два-три гола разлика, па се до највисоките 20-16 во 41-та минута.
Јунак во нашиот тим беше голманот Митревски со 14 одбрани и клучни интервенции на трипати во клучни периоди, додека вистински лидер на тимот беше Кузмановски со 8 погодоци. Вечерва Филип Миркуловски го имаше својот последен настап во репрезентативниот дрес.
Фото: ФБ на РФМ
