Лидерот на ВМРО-ДПМНЕ Христијан Мицкоски синоќа повика на општонароден протест утре, в недела за поддршка на осудените за настаните во парламентот на 27 април 2017 година.
Според рутата што ја објави на својот фејсбук-профил, протестот ќе почне претпладне пред Владата, а ќе продолжи со марш до Собранието.
-Правдата не смее да биде слепа. И еден ден во затвор на неправедно осуден е тежок како година. Македонија не смее да ги заборави своите синови. Слобода за уставобранителите и поддршка на општонародниот протест, напиша Мицкоски на Фејсбук.
Од ВМРО-ДПМНЕ, во изминатите седмици, неколкупати посочуваа дека не се директни организатори на протестот, туку дека ќе го поддржат.
Поддршка за протестот, од Будимпешта, изрази и екс- премиерот Никола Груевски, кој беше на чело на ВМРО-ДПМНЕ кога се случија настаните во парламентот и е меѓу осомничените за организација на настаните на 27 април, ама не е опфатен со тековниот судски процес, затоа што е во бегство.
