Малолетник на возраст од 14 години е осомничен дека е еден од предизвикуивачите на неодамнешниот пожар во скопската населба Расадник, соопшти полицијата.
МВР соопшти дека против него поднело кривична пријава за сторено кривично дело „предизвикување општа опасност”.
-Пријавениот, заедно со уште две деца кои не наполниле 14 години и не подлежат на кривична одговорност, на 3.9.2024 околу 15 часот во местото викано „Расадник“, на територија на општина Кисела Вода во Скопје, фрлале пиротехнички средства кои претходно ги запалиле со запалка, по што се запалила сувата трева и настанал пожар кој зафатил површина од околу три хектари. Со брзата реакција на полициски службеници од СВР Скопје, во координација со други служби, пожарот е локализиран и спречено е настанување на штета од големи размери, извести МВР.
