Со спектакуларна церемонија во Париз, која траеше три часа и 30 минути, беа отворени 33 Летни олимписки игри 2024 година. Делегацијата на Македонија. ќе ја претставуваат шест спортисти.
Првпат церемонијата на отворањето на Игрите не се одржа на стадион. 85 брода со речиси 7.000 спортисти на пловечка парада на Сена долга шест километри, продефилираа во срцето на Париз. Поаѓајќи од мостот „Остерлиц“, бродовите пловеа покрај катедралата Нотр Дам и пристигнаа во близината на Ајфеловата кула.
Македонското знаме на отворањето на најголемиот спортски настан во светот го носеа Мила Рељиќ и Дарио Ивановски. Покрај нив двајца, во олимпискиот тим се и Еди Шерифовски, Анастасија Мојсовска, Владимир Егоров и Никола Ѓуретановиќ.
На најголемиот спортски настан во светот ќе учествуваат 10.714 спортисти од 206 земји, во 45 натпревари и 32 спортови. Ова ќе бидат шести најскапи Игри во историјата, а Французите за овој настан издвоиле 8,2 милијарди долари.
Околу 80 огромни екрани го емитуваа шоуто, кое имаше пловечка парада на спортисти и уметници, со танчари што настапуваа од покривите на зградите по должината на Сена.
Шоуто го следеа повеќе од 300.000 гледачи од брегот на Сена. Бродовите што ги превезуваат спортистите имаа камери за да им овозможат на оние што гледаат на ТВ или на нивниот телефон да добијат поглед одблиску.
Имаше и музичко шоу кое предизвика најразлични реакции, но не го наруши спектаклот во „градот на светлината“, кој продолжи со неверојатното шоу пред Ајфеловата Кула.
Таму олимпискиот факел прв го зеде Зинедин Зидан, го предаде на Рафаел Надал, од каде преку рацете на Серена Вилијамс, Команечи, Карл Луис, Морезмо, Гигу, Тони Паркер… на крајот заврши кај Мари Жозе Перек и Теди Ринер, кои го запалија олимпискиот пламен, кој со воздушен балон се крена над Париз, каде сите ќе можат да го гледаат за време на овие Олимписки Игри.
На крајот говореше претседателот на Меѓународниот олимписки комитет (ИОК), Томас Бах, кој му дозволи на претседателот на Франција, Емануел Макрон, да ги прогласи Игрите за отворени.
Шоуто заврши со извонреден настап на Селин Дион од Ајфеловата Кула, за заокружување на овој спектакл.
Македонското знаме на отворањето на најголемиот спортски настан во светот го носеа Мила Рељиќ и Дарио Ивановски. Покрај нив двајца, во олимпискиот тим се и Еди Шерифовски, Анастасија Мојсовска, Владимир Егоров и Никола Ѓуретановиќ.
