На ридот над Усје ќе никнат 1.200 чемпреси

Денеска на ридот над Усје започна засадувањето на околу 1.200 аризонски чемпреси. Се работи за локација на ридот над игралиштето во Усје, на површина од 5.000 м2.

– Обезбедивме донација од околу 1.200 аризонски чемпреси кои најдобро се прилагодуваат на временските услови на нашиот регион. На овој начин ја подобруваме естетиката на овој запуштен простор, но и креираме природен филтер против загадувањето. На жителите на општина Кисела Вода им ветив подобрување на квалитетот на живот во секој негов сегмент, ветив чиста и зелена општина. Денешната акција во населеното место Усје и сите оние кои ќе следат после неа, се знак дека планирам да ги исполнам сите мои дадени ветувања, изјави градоначалникот на Кисела Вода Орце Ѓорѓиевски.

Во периодот што следи, како што велат од Општина Кисела Вода, предвидени се и други вакви акции за пошумување и зазеленување на општината.