Најголемата и најмоќната ракета некогаш направена денеска полета од Тексас, но се разнесе за неколку минути при пробен лет за кој нејзините производители, „СпејсХ“, се надеваа дека ќе биде првиот чекор на човечкото патување до Марс.
По откажаното лансирање претходно оваа недела поради проблем со притисокот, 120-метарскиот ракетен систем „Старшип“ полета денеска во 8,33 часот по локално време. Ракетата доби брзина, но потоа почнал да се врти на височина пред да експлодира околу четири минути по напуштањето на земјата.
Се чинеше дека двата дела од ракетниот систем – засилувачот и бродот за крстарење – не можеа правилно да се одвојат по полетувањето, што веројатно предизвикало откажување на вселенското летало.
„СпејсХ“ претходно предупреди дека шансите за успех се мали и дека целта на пробниот лет е да се соберат податоци, без разлика дали е постигната целосната мисија. Вработените во „СпејсХ“ навиваа дури и откако ракетата експлодираше.
Речиси колку три патнички авиони, вселенското летало мамут е 10 метри повисоко од ракетата „Сатурн V“ што испрати луѓе на Месечината во 1969 година.
Илон Маск, основачот на „СпејсX“, минатата недела го доби потребното одобрение од Федералната управа за авијација за лансирањето да продолжи. Тој се огласи на Твитер неколку минути по лансирањето и експлозијата на најмоќната ракета на светот. Маск им честиташе на своите колеги и рече дека „научиле многу“ во подготовките за нивното следно лансирање, кое, како што рече, ќе се случи за неколку месеци.
Од SpaceX нагласуваат дека главната цел била успешно лансирање, а се после тоа би било само бонус во оваа фаза на тестирање. Тие најавија натамошно продолжување на тестирањето.
Starship се состои од 50-метарско вселенско летало дизајнирано да носи екипаж и товар што се наоѓа на 70 метри висока ракета Super Heavy. Целосно наречени Starship, вселенското летало и ракетата Super Heavy никогаш не биле лансирани заедно, иако имало неколку суборбитални пробни летови на самото вселенско летало.
