Американските обвинители покренаа нови обвиненија против Доналд Трамп за неговиот наводен обид за мешање во изборите во 2020 по поразот од Џо Бајден. Тие се одговор на минатомесечната пресуда на Врховниот суд на САД дека американските претседатели имаат имунитет од кривично гонење додека се на функција.
Ревидираните обвиненија ги содржат истите четири кривични точки против Трамп, но тие сега се однесуваат на неговиот статус како политички кандидат, а не како актуелен претседател. Трамп ги негира обвиненијата за мешање во изборите, но останува на своето тврдење дека имало голема изборна измама во 2020.
Според новото обвинение, што го покрена специјалниот обвинител Џек Смит, Трамп се товари за заговор за измама против САД, заговор за попречување на официјална постапка, обид за попречување на официјална постапка и за заговор против правата.
Трамп на својата социјална мрежа напиша дека ова е „обид да се оживее мртов лов на вештерки и да се одвлече вниманието на Американците од претстојните избори“. Тој повика обвиненијата веднаш да бидат отфрлени.
Во новиот документ се вели дека Трамп дејствувал како приватен граѓанин, а не како претседател, кога ја извршил наводната шема за поткопување на изборите.
