Љупчо Палевски-Палчо попладнево е на распит во обвинителството, по околу 20 дена од неговата екстрадиција во земјава. Првоосомничениот за убиствата на 14 годишната Вања Ѓорчевска и на 74 годишниот Панче Жежовски ќе се соочи со доказите на обвинителството за случајот. Претходно се вештачеа предметите кои тој ги донесе со себе по спроведувањето од Турција, а меѓу кои имало и документи.
Палевски беше екстрадиран на 15 мај и од аеродромот заврши зад решетки Шуто Оризари, бидејќи му беше определен притвор во отсуство. За прв пат со јавноста се соочи по неколку дена кога во Кривичниот суд се произнесе за околностите за неговиот притвор. Тој изјави дека е невин, дека не бил во бегство и дека нема да се брани со молчење.
Истрагата за Палевски може да трае максимум 6 месеци, по што би требало да се поднесе и обвинителен акт.
Скопското јавно обвинителство неодамна до Основниот кривичен суд Скопје поднесе обвинение против четворица обвинети за убиството на Вања Ѓорчевска и Панче Жежовски.
