Убиениот велешанец Панче Жежовски бил грабнат со цел да го даде неговиот автомобил за да биде искористен за грабнување на Вања Ѓорчевска. Ова го утврдило Основното јавно обвинителство Скопје кое донесе Наредба за спроведување истражна постапка против пет лица. Од нив, четворица како соизвршители сториле две кривични дела грабнување од член 141 од Кривичниот законик, како и две убиства на свиреп начин, едно на малолетно лице и едно од користољубие, заедно казниви по член 123 став 3 од Кривичниот законик. Петтиот осомничен им помогнал при извршување на кривичното дело грабнување на малолетно лице.
За четворица осомничени, кои веќе се наоѓаа во 48-часовен притвор, надлежниот јавен обвинител до судијата на претходна постапка достави предлог за определување мерка притвор.
-Постои основано сомнение дека на 22 ноември, четворица од осомничените, по претходен договор и заедно, извршиле грабнување на лице од неговиот дом во Велес со намера да го присилат да го даде неговиот автомобил ситроен за тие да го искористат за грабнување на малолетно лице во Скопје. Откако влегле во неговиот дом, физички го нападнале, го врзале и со автомобил го однеле во близина на селото Рудник, каде со учество на дејствие на извршување и со друг особен придонес кон извршување на делото, од користољубие и на свиреп начин го лишиле од живот со истрел од огнено оружје од еден од осомничените. На 27 ноември четворицата осомничени, помогнати од петтиот, извршиле грабнување на малолетно лице со намера да присилат член на нејзиното потесно семејство да даде пари за откуп на детето. Притоа го искористиле и одземениот автомобил. Подоцна на свиреп начин и со умисла ја лишиле од живот жртвата, а со претходно купен бензин го запалиле автомобилот ситроен, соопштија од ОЈО Скопје.
Осомничени за нивното убиство се Љупчо Палевски – Палчо и неговите сопартијци, Велибор Манев, Влатко Кешишов и Боре Видевски, кои се дел од партијата Десна. Осомничен дека споделувал информации со останатите осомничени за движењето на Вања Ѓорчевска е и нејзиниот татко, Александар Ѓорчевски.
