Нови 1.675 заболувања од грип или, пак, слични на грип, се пријавени во земјава во третата недела од годинава, а тоа е 41,7 отсто повеќе споредено со претходната седмица, соопшти Институтот за јавно здравје.
Бројот на заболени е поголем за 47,6 проценти споредено со минатата сезона, а зголемувањето е за 32,2 проценти споредено со третата недела од типичната епидемиска крива (моделирана во последните 13 сезони).
Во однос на возрасната дистрибуција, 1.012 лица се на возраст од 15-64 години, 256 деца на возраст од 5-14 години, 237 деца на возраст од 0-4 години и 170 се лица на возраст над 65 години. Највисока инциденца се регистрира кај децата на возраст од 0-4 години.
Во Скопје има 295 заболени, во Битола 287, во Тетово 165, во Гостивар 149, во Дебар 110, во Куманово 104, а во останатите региони помалку од 100.
-Во оваа недела е регистриран еден смртен случај асоциран со грип. Лицето било од Неготино и имало 45 години. Било хоспитализирано во КИБФС. Кај починатото лице биле утврдени коморбидитети (кардиоваскуларни болести, белодробни болести, дијабетес и обесност) и не било вакцинирано против сезонски грип. Лабораториски е потврдена Инфлуенца А (Х1) пдм09, соопшти ИЈЗ.
Вкупниот број случаи на грип или, пак, заболувања слични на грип во сезоната 2023-2024 година е 5.175. Споредено со истиот период од минатата сезона, се бележи зголемување од 22,3 отсто.
