Власта е упорна во повикувањето на опозицијата да гласа за наметнатите уставни измени. Скоро да нема ден некој од таа партија да не го повика ВМРО-ДПМНЕ да гласа за она што го наумила Владата. Така е и денеска:
-Сите партии, а особено ДПМНЕ да дадат поддршка на Манифестот за преговорите со ЕУ, кој претставува добра основа за обединување на европскиот пат и зад кој застанаа СДСМ и сите политички партии од парламентарното мнозинство, велат од СДСМ.
Одамна е веќе вообичаено за двете партии на соопштение да има контрасоопштение:
-Димитар Ковачевски и СДС се самоцензурираат. И по месец дена откако најавија некаква Декларација за Илинден за заштита на државните интереси и значењето на Илинден за Македонија и македонскиот народ, ниту Ковачевски, ниту СДС збор не изустиле што содржи истата и кога ќе ја поднесат. Им забрани ли Румен Радев на Ковачевски и владата на СДС и ДУИ да ја поднесат Декларацијата за Илинден која месец дена наназад помпезно ја најавуваа? До каде е и што содржи таа Декларација?Зошто Ковачевски и СДС се уште не ја поднеле и од што се исплашија? Владата на СДС и ДУИ нема двотретинско мнозинство за уставни измени и затоа повикува на консензус. Но, единствено им е важен консензусот за ден повеќе да крадат. Ставот на ВМРО-ДПМНЕ е јасен. Консензус за уставни промени нема, стои во соопштението на опозиционерите.
И така, си разменија соопштенија, а сигурно веќе ги подготвуваат и новите за денеска, а попладне веќе и новите обзнани за утре…
Излез од сето ова се чини се само итни избори.
