Секој има право на свое мислење и став, дури и кога доаѓа после години молк. Но граѓаните и СДСМ, одамна и на време избраа европска иднина, соопшти денеска СДСМ како одговор на обраќањето на Бранко Црвенковски, поранешен претседател на државата и лидер на СДСМ кој побара партијата да се огради од ставовите на Заев.
-Граѓаните избраа да носат храбри и патриотски одлуки, кои конечно и практично ја движат македонската држава и целиот наш македонски народ кон исполнување на стратешките цели НАТО и ЕУ. Денеска резултатите на политиките на СДСМ и на Владата предводена од СДСМ се видливи на дело, а не само на зборови, се наведува во соопштение.
Црвенковски претпладне го повика раководството и членовите на СДСМ да се оградат од Зоран Заев по скандалозното интервју за бугарската агенција „Бгнес“.
Во одговрот се потенцира дека искажаните ставови на претседателот на партијата и премиер, Зоран Заев, „се ставови на СДСМ“.
–Овие ставови се изградени во рамки на партијата и нејзините органи, овие ставови се државни ставови и државни позиции, врз основа на довербата на граѓаните на последните избори. Став на партијата, на Владата, на претседателот Заев, но и државна позиција е дека македонската иднина е во Европската Унија, дека Македонците со својот македонски јазик чекорат напред кон Европа, кон просперитет и кон пријателство со сите соседи, наведува СДСМ
Од партијата порачуваат дека обраќањето на поранешниот претседател, Бранко Црвенковски, после долги години молк и немање став за важни државни или национални прашања, нека го толкуваат граѓаните.
–Дали е тоа принципиелен однос кон својата партија и кон членството на СДСМ, ќе ценат членовите на СДСМ и граѓаните. Во исто време, СДСМ и натаму ги почитува и ќе ги почитува сите важни политички одлуки кои партијата ги донела во времето кога беше раководена од Црвенковски, а со кои државата беше насочувана кон прогрес и кон демократски и европски вредности, се наведува во соопштението.
