Висината на исплатата на посмртната помош што се исплатува на семејството на починатиот пензионер изнесува 35.000 денари за починатите пензионери од 1 јануари 2024 година, соопшти денеска Сојузот на здруженијата на пензионерите на Македонија. Тоа е за 5.000 денари повисока посмртна помош отколку што изнесуваше досега. Истовремено, висината на задршката за солидарниот фонд е намалена од 150 на 140 денари.
Овој износ ќе го добиваат семејствата на починатите пензионери од јануари до 30 јуни, а е резултат на одлуката за времено определување на висината на задршката за солидарен фонд – посмртна помош, членарина и висината на исплатата на посмртна помош на здружението на пензионери. Таа е донесена на крајот на 2023 година, а е објавена во Службен весник на 27 декември лани.
Во овој шестмесечен период, според одлуката, од пензиите ќе се одвојуваат по 140 денари за солидарниот фонд што е помалку за 10 денари од претходниот износ. Овој износ за солидарниот фонд на пензионерите им е пресметан во јануарската пензија која веќе ја примаат.
