В петок почнува собирањето потписи за претседател и пратеници во подрачните канцеларии на ДИК

Од петок 23 февруари па до 8 март ќе трае рокот за собирање потписи за кандидати за претседател и за кандидати за пратеници, соопштија од Државната изборна комисија (ДИК).

Државната изборна комисија (ДИК) на седница донесе Правилник за собирање на потписи, којшто денеска ќе биде објавен на веб – страницата на Комисијата sec.mk.

– Собирањето на потписи се одвива пред сите подрачни одделенија и канцеларии на ДИК сместени во седиштата на 34 локални самоуправи и пред надлежните нотари, за тоа и кон ова појаснување ќе бидат објавени и адресите на подрачните одделенија на ДИК пред кој се собираат потписите. Постапката почнува на 23 и трае непрекинато секој ден. Подрачните одделенија ќе работат две смени. Наутро од 8 часот до навечер до 20 часот, додека последниот ден на 8 март ќе работат до 24 часот, информира членот на ДИК Борис Кондарко.

Иницијативата за собирање потписи за поддршка на поднесена листа на кандидат за претседател и пратеници, како што рече, се поведува со поднесување на известување и изјава на ДИК од страна на предложениот кандидат односно лицето овластено од негова страна со генерално известување заверено на нотар. Потребните документи ќе бидат објавени на веб страната на ДИК и сите заинтересирани ќе можат од таму да ги симнат.

ДИК денеска го усвои и Правилникот за постапување на полицијата за време на спроведување на изборите. Претседателот на Комисијата Александар Даштевски истакна дека се работи за истиот Правилник од изборите во 2021 година.

Инаку, досега само двајца кандидати јавно соопштија дека ќе собираат 10.000 потписи на граѓаните – Билјана Ванковска, како кандидат на „Левица“ и Вело Марковски, како независен кандидат.

 

Претходна вестАндоновски: Се пофалија дека со медихоптер го префрлија Леонид во Виена, а потоа Фондот му го одби барањето
Следна вестKонцерт во чест на Борис Трајковски во Националната опера и балет