Во текот на вчерашниот ден аплицирани се вкупно 5.246 дози вакцини, од кои 1.253 се аплицирани како прва доза, 3.897 се ревакцинирани, а 425 граѓани примиле трета доза вакцина. Заклучно со вчера вкупно се вакцинирани 791.141 граѓанин, ревакцинирани се 737.979, а трета доза примиле 96, соопшти Министерството за здравство.
Педесет и три отсто од граѓаните над 40 -годишна возраст, како што се посочува, се ревакцинирани, а 32 отсто од популацијата од 18 до 39 години примиле една доза вакцина.
Опфатот со вакцинација со една доза вакцина, на полнолетната популација е 47 отсто, а со две дози опфатени се 44 отсто од граѓаните над 18 години.
Според бројот на аплицирани вакцини, 38 отсто од целата популација во земјава е вакцинирана, а 35 отсто од вкупното население е вакцинирано со две дози вакцини.
Во меѓувреме, од петокот е затворен пунктот во салата „Борис Трајковски“, а функционираат пунктовите во седумте поликлиники: „Букурешт“, „Јане Сандански“, „Чаир“, „Ѓорче Петров“, „Драчево“, „Ченто“ и „Шуто Оризари“.
Дали во услови кога се повикува на масовна вакцинација како најсигурна заштита од ширење на ковид, и се најавува дека трета доза за сите категории граѓани, треба да се затвори најголемиот вакцинален пункт во земјава?
