Пратеникот на ВМРО-ДПМНЕ Миле Лефков обвини денес дека во т.н. скандал “Бисера Антоанета” претходната министерка за култура Бисера Костадиновска Стојчевска во текот на четири дена во Лондон купувала со народни пари чорапи и хулахопки, плишана мечиња, фудбалски топки, куфери и потрошила 714 фунти.
Тој рече дека согласно уредба е регулирано трошоците кои ги прави министерот за култура на месечно ниво да не можат да надминат 60 евра во денарска противредност и дека истите треба да направат раздолжување во благајничката каса во рок од 7 дена по завршувањето на службениот пат. „Бисера Антоанета“ во неколку наврати го пречекорила дозволеното ограничување, а се раздолжувала и по неколку месеци.
-Ова е само вовед. Суштината е во деталите, а тоа во овој случај е како се трошени средствата на граѓаните од страна на Бисера Антоанета. Денес ќе го презентираме првиот случај. Имено во октомври 2023 година министерката Бисера Антоанета остварила службено патување во Лондон во траење од 4 дена, од 24 октомври до 27 октомври, и покрај трошоците направени за хотелско сместување, во патниот налог има приложено сметки за репрезентација, но при уводот на содржината на сметките за репрезентација и увидот во приложените сметки од службената картица ВИЗА, се констатира ненаменско трошење на буџетски средства спротивно на прописите, наведе Лефков.
Тој наведе дека Бисера Костадиновска потрошила 714 фунти исклучиво за лични потреби -во продавницата Gift Galore London потрошени се 89 фунти и купени се фудбалска топка – city football и плишано мече – Paddington bear и двете платени од службената картичка ВИЗА.
-Шопинг манијата на „Бисера Антоанета“ не запрела тука, туку продолжила и во познатата продавница за куфери Samsonite, каде министерката со средства од Буџетот решила да се поднови со два куфара еден голем Upscape spiner 68/25 Black во износ од 219 фунти од службената картичка и еден помал од истата линија во износ од 59 фунти платен во кеш од службените парични средства. Нормално за да можеме да ја наречеме „Бисера Антоанета“ трошењето морало да продолжи, таа со народни пари пазарела во Mарк & Спенсер каде потрошила 42 фунти за чорапи и хулахопки платени во кеш од службените парични средства, наведе тој.
Во GIFT BOX во Лондон, продавница за подароци потрошени се 146 евра од службената картичка ВИЗА и за ова трошење нема доставена никаква сметка тука само слипот од платежната картичка. Исто така потрошени се 158 фунти платени во кеш од службените парични средства во Warner Bros за подароци како што се раквици, маички, ташна за милениче, изгубената дијадема и сл. Се на се, за лични приватни потреби Бисера Антоанета троши 714 фунти или пресметано во денарски парични средства 51.169 илјади денари, за четири дена во Лондон, пари со кои во Македонија се храни цел месец едно четиричлено семејство.
-„Бисера Антоанета“ се расфрлала со народните пари, за лични задоволства. Ова е само почеток, во наредните неколку дена ќе покажеме до каде одела раскалашеноста на „Бисера Антоанета“ и зошто велиме дека Македонија е ограбена држава, објави на прес конференција Миле Лефков, откако лидерот на ВМРО-ДПМНЕ Христијан Мицкоски за САД леташе со бизнис класа и си го однесе и синот, наведе тој на партиската прес-конференција.
