До крајот на неделава старата гинеколошка болница на „Систина“, поранешна „Мала богородица“, ќе биде пренаменета во инфективно одделение каде ќе може да се лекуваат 100 пациенти. Лекувањето ќе биде бесплатно, на трошок на државата, а за пациентите ќе се грижи лекарски тим од „Систина“, „Жан Митрев“ и „Ре-медика“. Ова било договорено на синоќешната средба на министерот за здравство Венко Филипче со претставници на трите најголеми приватни болници, „Систина“, „Жан Митрев“ и „Ре-медика“.
Освен ова, министерот за здравство Венко Филипче најави дека и на хируршките клиники неделава ќе бидат отворени дополнителни болнички кревети за Ковид-пациенти.
-На скопските клиники засега има доволно кревети, а максимално е ангажиран и медицинскиот персонал. Поставеноста на системот покажа дека добро функционира и дека дава резултати во поголем број оздравени пациенти и во доволен број слободни кревети, рече Филипче.
Според сопственикот на „Филип Втори“, Жан Митрев, сите се на ставот дека треба да помогнат колку што можат.
-Начелно имаме концепт и стоиме зад сето тоа. Министерот и Министертсвото треба да го водат сето тоа, ние сме тука да помогнеме и во опрема и во кадар и во логистика. Засега нема никакви недоразбирања или непто околу што би се расправале, напротив, мислам дека сме сите сме во тој правец – да помогнеме колку што можеме во оваа ситуација, истакна Митрев.
