Во среда на 22 мај ќе се одржи прегласување на седуммте избирачки места во петтата и шестата изборна единица. Одлуката за прегласување ја донесе Државната изборна комисија откако Управниот суд ги одби како неосновани сите седум тужби од коалицијата „Европски фронт“ против решенијата на ДИК.
Поради ваквата одлука на Управниот суд и на ДИК, ДУИ обвини дека се прави изборен инженеринг со цел на партијата да и се одземат две освоени пратенички места.
ДИК на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино.
Резултатите можат да го променат бројот на освоени пратенички мандати кај политичките партии.
Од вечерва на полноќ започнува предизборниот молк кој ќе трае до среда 22 мај, 19:00 часот.
