Моралната одговорност во случајот со пожарот во модуларната болница во Тетово е постигната со тоа што се понудени четири оставки, смета премиерот Зоран Заев, кој и понатаму смета дека за нив треба да одлучи откако ќе ги добие извештаи од истражните органи.
Заев вели дека не може едноставно да се разрешуваат министри, зашто треба да се мисли и што понатаму односно дали треба да се донесе некој нов да се учи како да менаџира со пандемијата.
При одлучувањето дали ќе ги прифати оставките на министерот за здравство и заменикот, Венко Филипче и Илир Хасани, и директорите на тетовската болница, Флорин Бесими и Артан Етеми, според денешната изјава, премиерот ќе оценува и како работеле тие досега, а нема да го земе предвид само случајот со болницата.
Заев вели дека би ја напуштил политиката ако може да ги врати животите на 14 – те жртви од трагедијата и дека заминувањето на министерот за здравство ќе го отежне управувањето со пандемијата.
