Единствена казна затвор од две години и три месеци му е изречена денеска во Основниот кривичен суд Скопје на 21-годишниот Шукри Зеќири од Скопје за предизвикување на сообраќајна несреќа во која загина едно дете. Тој на 12 октомври на булеварот „Никола Карев“, на делот познат како „Пластичарска“ во Скопје удри десетгодишно дете кое од ударот почина на самото место, а тој избега.
На обвинетиот, судијката му одреди и казна забрана за управување со моторно возило во период од три години со што времето поминато во затвор не се смета во казната и му ја продолжи и мерката куќен притвор сѐ до правосилноста на пресудата.
Обвинетиот Зеќири претходно пред Судот го призна делото кое му се става на товар, но рече дека избегал од страв да не биде тепан.
Според обвинението од Основното јавно обвинителство Скопје, обвинетиот се товареше за кривично дело „тешки дела против безбедноста на луѓето и имотот во сообраќајот“ по член 300 став 4 во врска со член 297 став 3 во врска со став 1 и кривично дело „неукажување помош на лице повредено во сообраќајна незгода“ по член 301 став 1 од Кривичниот законик.
