Неспособната и неодговорна власт на СДС и ДУИ 7 години не направи ниту километар автопат во Македонија, го уништи железничкиот сообраќај до ниво да нема возови кон Кичево и Кочани, а кон Битола да се сообраќа само еден воз дневно кој патува и по половина ден, соопшти денеска ВМРО-ДПМНЕ.
Најголемата опозициска партија наведува дека оваа катастрофа која ја оставија зад себе мора да се надмине и во Македонија да се довршат отпочнатите и да се градат нови капитални инвестиции од патната инфраструктура. Тоа ќе значи поттик за економијата во земјата.
-Согласно направените анализи и градежните капацитети следната влада на ВМРО-ДПМНЕ до крајот на 2026 ќе го доврши автопатот од Кичево до Охрид, кој СДС и ДУИ 7 години не можеше да го доврши. Впрочем власта на СДС и ДУИ само ја зголеми цената на овој автопат до 600 милиони евра и не реализираше ниту 20 отсто дополнителна градба. Во исто време новата влада на ВМРО-ДПМНЕ ќе ја доврши изградбата на експресниот пат од Градско, преку Росоман до Прилеп кој со правилен менаџмент и со јасен план ќе се финализира до 2026 година, се наведува во соопштението.
Се додава дека не само што ќе се довршат фамозните 2 километри од Скопје кон Блаце, туку до крајот на мандатот на идната влада на ВМРО-ДПМНЕ во целост ќе се реализира автопатот кон граничниот премин Блаце.
-Во првата година од новата Влада на ВМРО-ДПМНЕ ќе се заврши изградбата на експресниот пат од Ранковце до Крива паланка, а две нови патни делници ќе бидат испроектирани до ниво на проект, а тоа е експресен пат од Струмица до граничниот премин Ново Село и автопатската делница од Велес преку Чашка до Прилеп. Дополнително ќе се инвестира во модернизација на сигнализацијата и безбедноста на патиштата, но и ќе се реновираат и железничките пруги, со цел возовите да можат брзо и безбедно да се движат по нив, бидејќи железничката инфраструктура е неопходна за економски и стопански развој во земјата. Она кое што ВМРО-ДПМНЕ го ветува, тоа и го реализира, наведуваат од оваа партија.
