Македонија ќе има нов претседател, цензусот е исполнет, а отворениот бојкот на ДУИ не успеа, рече вечерва потпретседателот на ВМРО-ДПМНЕ, Тимчо Муцунски.
На прес-конференцијата тој додаде дека очекуваат одличен резултат на изборите.
-Очекуваме одличен резултат и сосема извесно е дека Гордана Силјановска-Давкова ќе биде идниот претседател на Македонија, рече Муцунски.
Тој потенцира дека повикот на ДУИ за бојкот не успеа, а денот ги извади на виделина игрите на власта.
-ДУИ посакува криза и преку бојкот сакаше да се факторизира. ДУИ изгуби, бојкотот не им е успешен, извесно е дека одат во опозиција. Пропадна сценариото да се создаде криза во државата, се радуваме што е постигнат цензусот, извесно е дека Давкова е новиот претседател. Очекуваме уште подобар резултат од првриот круг, и уште вечерва да биде јасна сликата како ќе изгледа идната Влада на Република Македонија. Очекуваме да имаме резултат што ќе го отслика опозициското расположение во државата, рече Муцунски додавајќи дека ДУИ е дел од криминална власт што станува минато.
Како што рече, народот излегол за да си ја врати Македонија, односно контролата врз системот бидејќи државата наместо на елитите треба да му припаѓа на народот.
ВМРО-ДПМНЕ оцени дека дека изборниот ден генерално поминал мирно, со поединечни нерегуларности. Муцунски објави дека неколку функционери биле фатени во илегални активности со поткуп и ги повика интитуциите да истражат и да го испитаат потеклото на парите.
