Првиот човек на Движењето ЗНАМ – За наша Македонија, Максим Димитриевски, денеска потенцира дека повод неговоа вонредна прес конференција е како што рече „веќе виденото сценарио што и претходно во многу наврати беше применето кон него и кон неговите истомисленици, а во моменти на предизборни и изборни активности во кампања“.
При тоа Димитриевски објасни:
-Во овој случај само се потврдува до сега многу пати повтореното тврдење дека власта преку своите сателити инсталирани во судско-обвинителската власт, креира неосновани случаи, го злоупотребува правниот систем, во случајов Обвинителството, а во одредени моменти и дел од судиите на Уставниот суд, за да креира неосновни кривични пријави за наводна злоупотреба на службената положба и овластување од моја страна како актуелен градоначалник на Општина Куманово, истакна тој, пренесува Макфакс.
Димитриевски потенцира дека не е случајно, што токму во овој момент, кога е номиниран за кандидат за Претседател на Македонија од политичката партија Движење ЗНАМ-За наша Македонија, поддржан од над 11.500 потписи на граѓаните, се изнудува и креира неоснован обвинителски предлог од страна на ОЈО Куманово и обвинителот Иса Сулејмани, за кого претходно од неговиот адвокатски тим е побарано изземање од постапката поради пристрасност и селективно постапување во предистражна постапка.
-Ова е прв пат, кога обвинителството го штити приватниот, а не јавниот интерес, а овој обвинителен акт е само уште една потврда за таквото однесување, рече Димитриевски и додаде: „За жал, оваа владејачка структура се повеќе потстетува на режимот на бегалецот Груевски, бидејќи и методите се исти, дури и многу пософистицирани, иако во одреден период заедно со дел од нив се боревме против истиот тој режим“.
Димитриевски порача:
-Сакам да им порачам на сценаристите и режисерите на овој монтиран случај дека не постои сила, ниту цена која може да ме оттргне од мојот трасиран пат, да ги бранам државните, националните и интересите на сите граѓани не само на Куманово, туку и на Македонија. Напротив, за мене ова е дополнителен поттик да бидам уште поуверен во сопствените ставови, во ставовите на моите истомисленици и да ја истуркам оваа борба до крај. Се со единствена цел да се оневозможи на никој поединец во државата да му се случува вакво нешто, рече тој.
Запрашан за што конкретно станува збор Димтиревски истакна:
-Се работи за предмет којшто се води пред Основното јаввно обвинителство Куманово, во кое што еден од подносителите на кривичната пријава е всушност и потврден спонзор на една од актуелните партии во власта, којшто има личен интерес, да изгради станбен објект со катност од 11 спрата. Во општината согласно законите се води управна постапка, а јас бев претходно известен од страна на две јавни институции, гимназијата „Гоце Делчев“ и Школската амбуланта Куманово – Здравствен дом Куманово дека им е загрозен јавниот интерес, при што јас како градоначалник сум должен во вакви постапки истото да го проверам и доколку се потврди дека е загрозен јавниот интерес, тоа да го спречам. Во овој случај постои стручно мислење кое го потврдува јавниот интерес. Врз мене во континуитет се вршат различни форми на притисок за да се обезбеди градежна дозвола за изградба. Во овој случај за жал има инволвирано и лица, носители на највисоко ниво на функции во државата, вели тој.
Димитриевски рече дека не може да ги објави имињата на функционерите бидејќи смета дека може да ги загрози идните можни кривични постапки, кои од негова страна, а и по службена должност, ќе бидат водени против овие лица. За сите овие случувања известени се нашите стратешки партнери и пријатели ЕУ, САД и сите дипломатски претставници и меѓународните организации во Македонија, додава тој.
