Македонските политичари деновиве со нетрпение го чекаа Извештајот на Европската комисија за напредокот на Македонија кон ЕУ. Се чекаше што ли Брисел ќе каже, оти тоа им е многу важно, ако не и најважно…
И еве, стаса Извештајот. Еврокомесарот за проширување Оливер Вархеји (кој често доаѓа во Скопје за да ни даде нови лекции и задачи) при вчерашното објавување на документот даде генерална оценка дека Македонија има „издржан реформски напоредок кон ЕУ“ при што подетално се задржа и за состојбите во одредени области.
За што сме пофалени? Се чини дека најдобрите оценки Вархеји ги даде кога е во прашање усогласеноста на надворешната политика на Македонија со онаа на ЕУ.
Во текстот на извештајот стои дека е постигнат одреден напредок, со зголемена усогласеност со заедничката надворешна и безбедносна политика на ЕУ и со учество во мисии и операции на ЕУ за управување со кризи.
-Во однос на заедничката надворешна и безбедносна политика (ЗНБП), стапката на усогласеност на земјата со соодветните изјави на Високиот претставник на ЕУ и одлуките на Советот беше 96 отсто заклучно со август 2021 година (во споредба со 92 отсто во 2019 година и 94 проценти во 2020 година). Ова покажува позитивен тренд, што ја одразува стратешката ориентација на земјата, пишува во Извештајот на Европската комисија.
Значи, Владата е пофалена оти била послушна и делувала според надворешната политика на ЕУ. Но има ли друго што е за пофалба, нешто што носи конкретни добра за граѓаните во Македонија?
Независните експерти во Македонија оценуваат дека ова поглавје е речиси единствено каде има видливо подобрување.
-Единственото поглавје во кое имаме зголемено ниво на подготвеност за преземање на обврските за членство е во поглавјето за заедничката надворешна безбедносна политика. И покрај напредокот, очигледно е дека има многу области во кои препораките се повторуваат и тие стагнираат, оцени вчера Симонида Кацарска од Институтот за европска политика.
Па така, слабата алка во политичкиот дел е лоцирана во функционирањето на Собранието за кое во Извештајот се наведува дека е поларизирано што довело до одложување на носење на многу закони.
Истовремено, посебно се потенцира борбата против корупцијата и реформите на јавната администрација.
-Многу работа треба да се направи во подобрување на ефикасноста на спроведување на законот во борбата против одредени форми на криминал, како перење пари и финансиски криминал, оценува ЕК.
Дали луѓето од власта деновиве ќе се фалат дека добиле позитивен Извештај, останува на нивната проценка. Останува и граѓаните да проценуваат каков е всушност Извештајот, но и пред се каква е реалната ситуација во Македонија.