На точно еден месец од локалните избори, Скопје е претворено во градилиште. Овие денови затворена за сообраќај е улицата… овој викенд затворен за сообраќај е оној булевар… Речиси нема ден да помине без ваква вест. Но, не е првпат да бидеме сведоци како локалните власти одеднаш добиваат желба да се истакнат и тоа редовно пред избори.
Така е и со скопскиот градоначалник. Речиси секојдневно е на некоја локација каде или отвора пат, или најавува некоја комунална инвестиција.
Но, едно нешто веќе седум месеци боде очи на сите оние кои топлите летни вечери ги минуваат на плоштадот – дупката на некогашната подна фонтана каде во март пропадна возило-чистачка.
Сликата е ваква каква што ви ја пренесуваме: има две дупки, од кои поголемата е „обезбедена“ со некаква си пластика која би требало да предупреди некој од граѓаните дека има дупка. Другата пак, си стои така отворена и може да се „скенира“ целиот систем внатре.
И не е проблем ако дупката е тазе, а на властите им треба време да ја поправат. Оваа дупка тука стои седум месеци.
Ние и претходно ги потсетивме властите уште првиот меец дека дупката која зјае како кратер е потенијална опасност, но и грда слика за местото на кое прво доаѓаат туристите.
Се работи ли за поголемо оштетување, за недостиг на одредени делови или, пак, за потребата да се распише и јавен тендер за ваква поправка, не е познато.
Еве шест месеци потоа пак прашуваме: Има ли некој намера да ја затвори? Макар и како предизборен потег.
