Група јужнокорејски студенти ја тужат владата затоа што нивниот приемен испит завршил 90 секунди порано од предвиденото. Тие бараат по 20 милиони вони (15.400 долари), трошокот кој ќе треба да го платат за едногодишно студирање. Грешката влијаела на останатите испити на студентите, вели нивниот адвокат.
Озлогласениот приемен испит на факултетите во земјата, познат како Сунеунг, е осумчасовен тест во неколку предмети. Сунеунг е еден од најтешките испити во светот и влоговите се многу високи, пренесува „Би-Би-Си“.
За време на годишниот настан се преземаат голем број мерки за да им се помогне на студентите да се концентрираат како што се затворање на воздушниот простор на земјата и одложување на отворањето на берзата.
Резултатите од овогодинешниот испит беа објавени на 8 декември. Во тужбата, поднесена во вторникот од најмалку 39 студенти, се тврди дека во главниот град Сеул ѕвоното заѕвонило порано за време на полагањето по корејски јазик – првиот предмет на испитот.
Некои студенти веднаш се побуниле, но велат дека веднаш им биле одземени документите. Наставниците ја препознале грешката пред почетокот на следната сесија и ја вратиле минутата и половина за време на паузата за ручек, но празните колони оставени на тестовите останале, а на студентите не им било дозволено да менуваат ниту еден постоечки одговор.
Студентите рекоа дека биле толку вознемирени што не можеле да се фокусираат на остатокот од испитот, пренесува новинската агенција Јонхап. Некои наводно се откажале и се вратиле дома. Нивната адвокатка Ким Ву-сук изјави за локалните медиуми дека образовните власти не се извиниле.
Јавниот радиодифузен сервис „КБС“ цитираше официјални лица кои рекоа дека надзорникот задолжен за конкретниот тест погрешно го прочитал времето.
Ова не е прв пат студентите да тужат поради прерано ѕвонење. Во април, судот во Сеул им додели 7 милиони вони (5.250 долари) на студенти кои тврдеа дека се обесправени на испитот во Сунеунг во 2021 година, бидејќи нивното ѕвонче заѕвони околу две минути порано.
А цената може да биде уште повисока во други земји. Во 2012 година, еден маж во Кина беше осуден на една година условна казна за ѕвонење четири минути и 48 секунди порано за време на националниот приемен испит во училиште во провинцијата Хунан.
