Еколошка акција ќе се организира на кејот на Вардар. Ама не од надлежните. Чистењето го планира и ќе го спроведе граѓанската иницијатива „Не биди ѓубре“ во соработка со Институтот за комуникациски студии во рамки на кампањата „Разбуди се“.
– Неконтролираното исфрлање на цврстиот отпад на крајбрежјата на реките и езерата е еден од најсериозните проблеми за нивното загадување. Поради отсуството на контрола и санкционирање на несовесното фрлање на комуналниот отпад, покрај водотеците и во градските населби и во селските средини се создаваат диви депонии. Од нив голема количина пластика завршува во водите, предизвикуваат контаминација на подземните води, а потоа истата вода се употребува за наводнување на земјоделските производи. Отпадот наместо да биде соодветно собран, класифициран и обработен, целосно ги загадува водите, информираат од Институтот за комуникациски студии.
Иницијативата и институтот не се владини институции и немаат соодветни механизации за чистење, ама сепак одлучуваат дека со сопствени сили и средства ќе направат максимум. Прашањето е дали „Комунална хигиена“ ќе им се приклучи? Дали некој од функционерите можеби ќе земе метла в рака? Или пак тие се за пред камери и фини нешта?
До сега се нема пријавено ниедно јавно претпријатие дека ќе и се приклучи на иницијативата, ниту пак дека ќе донира средства за да им се помогне во работата.
