Се ближат претседателските и парламентарните избори. Многу незавршена работа остана од актуелниве функционери. Една од нив е да се намали – реформира администрацијата, да се намалат многуте државни институции кои и самите не знаат што им е задачата, да се намалат управните одбори…
Инаку, ако се почне од главата на државното тело, прво што е ептен видливо е дека во Македонија има и премногу пратеници и министри. Ем се и нефункционални, ем се и прескапи.
Зошто парламентот не би бил составен од 80 до 90 пратеници? Што фајде видовме што сега се 120? Многу поплодни дискусии и закони и правила и… има ако се многу? Вака бројни ја поведоа земјата кон подобра иднина?
Ако во Македонија се намалува населението – за што покажа и последниот попис зошто да не се намалат и пратениците кои го преставуваат населението во Собранието? Според последниот попис во земјава има помалку дури 185.834 жители. Тоа е скоро 200.000 лица помалку ќе го полнат буџетот од кој дебели плати примаат пратениците.
Словенија е слично голема како и Македонија. А многу побогата е. Таму имаат парламент составен од 90 пратеници.
Кај нас пренатрупаноста е и со министерства. Во Владата се измислија секакви министерства само за да се задоволат партиските апетити и некои лица да имаат големи канцеларии каде играат фудбал и од каде се договараат разни зделки…
Во македонската влада нема само уште министерство за ланскиот снег. И замислете сите тие многубројни министри имаат и заменици, помошници…
Зошто власта до сега не ја сведе Владата на помал број на членови? Сигурно ќе се функционира подобро без 4 до 5 министри и министерства. Па и нели ќе штедеа?
Властите имаат уште време да реагираат и да ги поправат работите, онака брзо како што си средија и за повисоки плати.
Македонија нема повеќе пари за џаболебари!
