Мицкоски: Избори да подготви техничка Влада, уставните измени да важат денот кога ќе отпочне ратификацијата на Протоколот во 27-те земји членки на ЕУ

Влез во Влада со пет од 10-те ресори со кои сега раководи СДСМ како услов да ги поддржиме уставните измени, и подоцнежно оддржување на парламентарните избори е понудата којашто денеска ја добив од премиерот Димитар Ковачевски, изјави изјави лидерот на ВМРО-ДПМНЕ Христијан Мицкоски по лидерската средба во Клубот на Пратениците. На прес-конференцијата тој ги објасни каков бил неговиот став и предлози. Мицкоски повторил дека 44 пратеници на коалицијата предводена од ВМРО-ДПМНЕ уставни измени под бугарски диктат на ваков начин, под овие околности ние нема да поддржат. Кажал дека преговарачката рамка со тие услови за ВМРО-ДПМНЕ е неприфатлива, но и за огромното мнозинство македонски граѓани бидејќи под тие услови ние никогаш нема да бидеме дел од ЕУ.

-Ковачевски предложи да во рамките на Парламентот отпочне дискусија и се отвори практично и се изгласа со две третини потребата за промена на Уставот, а потоа да биде формирана Влада во која што од десетте ресори кои што во овој момент ги менаџира СДСМ пет да бидат дадени на ВМРО-ДПМНЕ. Потоа, да бидат завршени уставните измени, значи да помине втората фаза и третата фаза, да отпочне практично процесот на преговори бидејќи пред една година нѐ убедуваа дека е почнат, а денеска добивме потврда дека тој процес на преговори не е почнат. Да отпочне процесот на преговори и дури потоа да бидат затворени можеби едно или две или три поглавја во зависност од брзината како ќе се одвива тој процес на преговори. А, таа Влада да оди на парламентарни избори. Да ги подготви парламентарните избори, објасни Мицкоски.

Тој рече дека одговорил на следниот начин.

-ВМРО-ДПМНЕ е подготвен да влезе во Влада со СДСМ и со останатите политички партии но без учество во истата Влада на Демократската унија за интеграција. ВМРО-ДПМНЕ е подготвен да учествува во истата со тоа што избори подготвува техничка Влада, не оваа Влада, 100 дена пред одржувањето на тие избори. А, евентуалните уставни измени да важат денот кога ќе отпочне ратификацијата на пристапниот Протокол на Македонија во рамките ЕУ од парламентите на 27-те земји членки, наведе Мицкоски.

Според него, премиерот на ова одговорил дека претставува кршење на Преговарачката рамка.

-Јас тогаш му реков во ред имам предлог јас за тебе. Да одиме на предвремени парламентарни избори кои што ќе се одржат на, три дати дадов како предлог, на есен генерално, да се формира влада на широко национално единство во која што нема да биде дел Демократската унија за интеграција и бидејќи ниту една земја членка на ЕУ нема против со македонскиот многувековен идентитет, традиција, култура, обичаи, македонскиот јазик, тогаш еве јас сум подготвен  да разговарам со неколку премиери на земји членки на ЕУ на следниот состанок на Европскиот Совет, да изгласаат потврда, гаранција за сето ова кое што ние го збориме па да видиме дали е навистина така како што ни велат дека е така, имајќи предвид дека сега и Бугарија има легитимна влада избрана од Националниот парламент таму. И со тој документ да дојдеме пред македонските граѓани  и да кажеме еве овој пат Европа застанува позади многувековниот македонски идентитет, култура, традиција, обичаи, македонски посебен јазик и дека овој пат конечно Европа има чиста и јасна цел пред себе Македонија да биде дел од европското семејство. Потоа да побараме од страна на претседателот на Европската Комисија определен економски пакет за македонските граѓани и за бизнисот да го подготвиме во процесот на преговори затоа што тој мора да биде конкурентен на европскиот пазар, да може да ги задржи луѓето тука, бидејќи знаете дека миграцијата, иселувањето е големо, потенцира лидерот на ВМРО-ДПМНЕ.

Во однос на Бугарија, тој рече дека има конкретен предлог.

-Од оние 14, 13 веќе завршени судски случаи пред Европскиот суд за човекови права во Стразбур, од коишто 6 се конечни и веќе во септември треба Бугарија да ги имплементира, да одбере 3, Бугарија да одбере 3 и тие 3 да ги примени. Еве Бугарија да одбере 3, нема ние да ги бираме. Од овие 6 за коишто постои во моментов од Советот на министри при Советот на Европа кон Бугарија ултиматум дека ќе следат санкции, да избере 3, само 3 и истите тие да ги примени и тогаш ќе речеме добро е, навистина постои нов ветар кај нашиот источен сосед, има добрососедство и нашинците во тој дел од земјата, односно во тој дел од Балканот, во Бугарија ќе можат да се почуствуваат дека некој во нивната матична држава стои позади нив. Тоа тој во овој момент не го прифати, бидејќи тоа значело промена на преговарачката рамка, наведе Мицкоски.

Тој на крајот рече дека лидерската средба ги покажа јасно позициите дека во овој момент нема двотретинско мнозинство во парламентот и дека час поскоро треба да има релаксирање во општеството.

-Единствен начин е практично час поскоро да одиме на предвремени парламентарни избори за да можат граѓаните да добијат влада каква што заслужуваат, а не влада каква што не ги застапува нивните интереси, рече Мицкоски.

 

Претходна вест77-годишник со „голф“ прегази малолетник
Следна вестПредупредување: Вештачката ителигенција ќе направи катастрофални нарушувања на пазарот на труд