Симболично, со положување на цвеќе пред споменикот на градителите и едноминутно молчење, делегација на АД ЕСМ, Подружница ХЕС „Маврово“, им оддаде почит на загинатите, кои ги загубиле животите во снежна лавина во 1956 година, градејќи го хидроенергетскиот систем Маврово.
Мавровската снежна трагедија, предизвикана од природна временска непогода, се случила ноќта на меѓу 10 и 11 февруари 1956 година, по долината на Радика (во околината на селата Рибница, Торбешки мост и Стрезимир).
Од планината Кораб снежни лавини се урнале врз куќи, бараките на градителите на мавровскиот хидроенергетски систем и караули, при што биле затрупани стотина луѓе. Спасувачките екипи успеале да извлечат само половина од нив.
Споменикот на градителите близу браната во село Маврови Анови е подигнат во 1970 година, а ја симболизира нивната храброст и пожртвуваност. На спомен плочата се врежани имињата на сите загинати во снежните лавини.
