Петмина македонски државјани чекаат да бидат евакуирани од завојуваното подрачје Газа. Идниот макеоднски амабасадор во Израел Шпен Садики денеска рече дека се работи за еден брачен пар и татко со две мали деца. На мајката на децата, која е палестинска државјанка ѝ е издадена виза.
Садики, кој денеска реферираше пред пратениците на Комисијата за надворешни работи во Собранието, рече дека дел од кризниот штаб сега е фокусиран на Газа во обид да се извлечат тие пет луѓе.
-Она што е невозможно да влијаеме е одлуката кога ќе се отвори границата. Таа одлука зависи од Египет и делумно од Израел. Во комуникација сме секојдневна со нашата вршителка на работи во Каиро Елма и со Мачеј во Тел Авив и со нашите државјани, рече Садики.
Новиот амбасадор, кој одговараше на прашање на пратеничката Благица Ласовска од ВМРО-ДПМНЕ за тоа што се прави за извлекување на наши граѓани од Појасот Газа, меѓу другото информираше дека се издадени патни листови за децата кои немале пасош, а мајката на децата е палестинска државјанка и за неа е издадена виза.
-Ќе зависи од египетските власти дали ќе дозволат таа да излезе од земјата. И ние ќе инсистираме. Амбасадата во Тел Авив не е акредитирана за палестинските територии. Неколку држави имаат формални релации со нив, но ние немаме и тоа е политичка одлука, но конзуларна заштита за Западниот Брег нудиме од амбасадата во Тел Авив, а за Газа преку амбасадата во Египет, рече Садики.
Новиот амбасадор истакна дека ние имаме мала дијаспора во Израел и дека бројката на наши граѓани таму се движи меѓу 200 и 300.
-Македонија ги следи позициите на Брисел и се залагаме за продолжување на преговорите сѐ до постигнување трајно и сеопфатно решение. Кризата во последните две недели покажа колку е важно сојузништвото на САД со Израел, пресудно за обезбедување поддршка за Израел, рече Садики.
Тој рече дека односите на Македонија и Израел се одлични, но имаме слаба секторска и економска соработка. Се предлага соработка во туризмот и економијата односно инвестиции. Посетите на највисоко нови ќе зависат од безбедносната состојба во земјата.
