Во интервјуто за бугарската агенција БГНЕС премиерот Зоран Заев бил прашан и дали се оградува од изјавата на македонскиот претседател Стево Пендаровски дека „Бугарија е живковистичка држава“ бидејќи, како што рече бугарскиот новинар, „Претпоставувам знае дека Тодор Живков 30 години не е на власт“.
Еве како одговорил Заев:
-Се разбира дека Претседателот знае. Верувајте, претседателот Пендаровски е пријател на Бугарија. Не е толку искусен политичар, како што е Зоран Заев. Затоа што пред тоа работел со нашите претседатели Борис Трајковски и Бранко Црвенковски, беше национален координатор за НАТО во мојата влада. Тој е сериозен општественик и е ангажиран целосно на пријателството со нашите соседи и со Република Бугарија и секако на нашата интеграцијата во НАТО и ЕУ. Некој пат, верувам дека и јас, не само тој, не сме доволно внимателни со зборовите. Ви кажувам отворено, дека во неговата душа и неговиот памет, е комплетно желбата и сонот за големо пријателство кое треба да го доизградиме и тој е голем поддржувач на договорот помеѓу Македонија и Бугарија, објаснил Заев на бугарскиот медиум што мисли за претседателот Пендаровски.
