Денеска во македонскиот парламент ќе продолжи вчера започнатата расправа за францускиот предлог, односно за Информацијата на Владата за содржината на Предлог-преговарачката рамка. Расправата започна вчера попладне но до крајот од работниот ден во парламентот се обратија само премиерот Димитар Ковачевски и неколкумина пратеници. Се работеше во тензична атмосфера на свирежи и навикувања. Денеска за збор се пријавени вкупно 42 пратеника што значи дека е прашање кога ќе заврши расправата.
Во обраќањето премиерот Ковачевски рече дека предлогот ги задоволува македонските барања.
-Тоа е тоа што го баравме. Нашата национална ДНК, македонскиот јазик, да биде службен и единствено официјален јазик. На македонски јазик ќе се зборува официјално и во Брисел и во сите европски престолнини. Тоа е најголемото достигнување, најважниот успех, истакна премиерот. Билатерални прашања не се дел од Преговарачката рамка со Брисел и таа е ослободена од ваков тип на прашања, рече Ковачевски.
Пратениците од ВМРО-ДПМНЕ со вувулзели, труби и свирки правеа бука за да не може да се чуе што говори премиерот и држеа транспаренти „предавници на народот“, „јазикот и идентитетот“, „народот вели не, свестете се“. Опозициските пратеници порачаа дека нема да дозволат уставни промени а дел од нив го искинаа и запалија францускиот предлог.
-Доста си игравте со Македонија. Слушнете го гласот на народот. Зошто и го прават ова на државата и народот и државата кога знаат дека почеток за преговори нема да има. Дојдоа со агенда за живот и економија, а се занимаваат со продажба на најсветото, рече пратеникот од ВМРО-ДПМНЕ, Драган Ковачки.
Пратениците треба да гласаат за заклучоците со кои на Владата и се дава насока и се задолжува за што може, а за што не може да преговара во процесот на интеграција во ЕУ.
Напоредно со ова, и денес пред зградата на Собранието ќе има протест против францускиот предлог за укинување на бугарското вето и деблокирање на преговорите за европска интеграција на Македонија. Организаторите најавија нов протест за денес во 11 часот, при што ќе биде блокиран булеварот пред законодавниот дом.
