Просечната плата во март стаса до 31.080 денари

Просечната нето-плата во земјава во март годинава изнесувала 31.080 денари, соопшти Државниот завод за статистика (ДЗС). Тоа е зголемување од 10,1 отсто во споредба со исплатената нето-плата по вработен во март 2021 година.

-Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Финансиски дејности и дејности на осигурување (21,4 отсто), Уметност, забава и рекреација (20,2 отсто) и Објекти за сместување и сервисни дејности со храна (19,5 отсто), се наведува во соопштението на ДЗС.

Зголемувањето на просечната месечна исплатена нето-плата по вработен, во однос на февруари 2022 година, е забележано во секторите: Финансиски дејности и дејности на осигурување (16,9 отсто), Рударство и вадење на камен (13,5 отсто) и Преработувачка индустрија (7,1 отсто).

Просечната месечна исплатена бруто-плата по вработен во март 2022 година во земјава изнесувала 46.430 денари и таа била зголемена за 10,3 отсто во споредба со истиот месец од минатата година.