Градската библиотека „Браќа Миладиновци“ во Скопје, којашто одбележува 78-годишнина од постоењето, денеска го пушти во употреба реновираниот оддел за литература за деца. На свеченоста присуствуваше и скопскат градоначалничка Данела Арсовска којашто упаи честитки што Градската библиотека добила место каде што најмладите ќе учат, ќе читаат и ќе го осознаваат светот низ игра во прекрасен простор.
-Ви честитам и на сѐ друго што како институција правите. Се надевам дека освен нашата поддршка, ќе ја добиете поддршката и од министерството за култура за да се пополнат работните места со професионалци, кои ќе ги пренесат своите знаења не само на најмладите, туку и на сите нас. Зашто без човечките ресурси ова е само една празна просторија, потенцираше Арсовска.
Одделението за литература за деца во централниот објект постои од 1974 година. Новиот и современ изглед е архитектонското решение на Александра Лазаревска (студио Арчи Нова) и ги следи потребите и читачките навики на денешните деца, но и актуелните текови во библиотечното работење. Просторот е од отворен карактер, со посебно акцент на светлината и боите кои создаваат пријатна атмосфера погодна за читање и креација.
-На реновирањето работевме цела година, буквално рушевме ѕидови за да стигнеме до простор каде што децата со радост ќе ги создаваат своите читачки навики. Не ги заборавивме и младите, кои тука ќе најдат не само лектири, туку и слободна литература и мултимедијални изданија. Во Македонија има експанзија на литература за деца и млади, па веруваме дека многу од тие наслови ќе бидат претставени токму тука. Одделот ќе работи според месечна програма која предвидува работилници, промоции, средби со автори и илустратори. Добивме голема донација на книги од неколку издавачи, но треба време за да се обнови целиот фонд. Предвидовме катче за слепи, слабовидни и дислексични лица за што се надеваме и на поддршка од општествено-одговорните компании и поединци, истакна директорката на Библиотеката, Снежана Стојчевска.
Одделот за литература за деца располага со книжен фонд од околу 20.000 книги.
