Шведскиот премиер вчера го повика шефот на вооружените сили да помогне да се спречи порастот на убиствата поврзани со банди во земјата. Премиерот Улф Кристерсон денеска ќе се сретне со шефот на вооружените сили Мајкл Бајден и со шефот на државната полиција за да разговараат за улогата на војската во справувањето со загрижувачките последици од конфликтот со бандите.
Само вчера двајца мажи загинаа во Стокхолм, додека 25-годишна жена загина во експлозија во куќа во град северно од главниот град, јавува Би-би-си.
-Ќе ги ловиме бандите и ќе ги победиме, вети премиерот Кристерсон во реткото телевизиско обраќање.
Сè уште не е јасно точно како војската би можела да се вклучи, но претходните разговори сугерираа дека војската би можела да преземе некои полициски должности за полициските службеници да можат да ослободат ресурси за борба против криминалот.
