Скопје се најде како еден од топ-10 листата европски главни градови коишто нудат најдобри ергенски и момински забави, според новото истражување на „Slot.Day“ кое го проучува квалитетот на ноќниот живот и трошоците за сместување во сите европски метрополи. Македонскиот главен град е четврти на топ-листата, веднаш зад Лондон (Велика Британија), Прага (Чешка) и Софија (Бугарија).
Британската престолнина има и најдобро оценет ноќен живот, но Скопје има трипати поевтино сместување, а најевтино и најприфатливо од сите 10 наведени градови.
– Изненадувачки е да се најдат места како Скопје, Тирана и Сараево кои нудат добар баланс на висококвалитетен ноќен живот и прифатливо сместување. Исто така, други скриени „скапоцени камења“ вон „разгазената патека“, се Вилнус, Рига и Кишињев, вели аналитичарот Мајкл Слот.
Новото истражување на „Slot.Day“ го проучува квалитетот на ноќниот живот и трошоците за сместување во сите европски метрополи. Споредбата се сосредоточува на бројот на високо оценети објекти за ноќен живот во секоја престолнина наведени на „Трипедвајзор“ (TripAdvisor), особено на оние што добиле четири ѕвезди и повеќе, од пет, а предвид се зема и цената на сместувањето.
– Свадбите може да бидат скапи, па затоа е клучно да се најде прифатливо место за уживање на вашиот ерген, т.е. вашата мома, без да мора да правите компромиси за забавата и квалитетот на одморот, што значи дека овие „откритија“ нудат фантастичен увид за сите парови кои сакаат „да избегаат“ некаде со своите пријатели и роднини пред „големиот ден“, додаде Слот.
Зад Скопје, на списокот се наоѓаат: Тирана (Албанија), Букурешт (Романија), Белград (Србија), Варшава (Полска), Берлин (Германија) и Сараево (Босна и Херцеговина).
