Секојдневно, не само што затвораме и растураме семејни веселби туку поднесуваме кривични пријави и за тие ќе има одговорност, нема да има толеранција за оние кои ги прекршуваат превентивните мерки против корона вирусот, изјави денеска Оливер Спасовски, министер за надворешни работи.
Тој објасни дека најголем дел од граѓаните ги применуваат заштитните мерки но секогаш има дел кој не го прави тоа.
-Јас истакнав благодарност до граѓаните кои ги почитуваат мерките, тоа се околу 90 отсто од граѓаните. Секогаш има десет проценти што мислат дека најмногу тие знаат и само тие го прават тоа што треба да се прави. За тие има санкции. Секојдневно, не само што затвораме и растураме семејни веселби туку поднесуваме кривични пријави и за тие ќе има одговорност, нема да има толеранција. Секаде, дали во Тетово, Куманово, Скопје, Источна Македонија, секаде каде што има такви состојби, рече Спасовски.
Тој рече дека секаде каде што се утврдило дека мерките се кршат ќе има санкции и апелираше сопствениците на угостителски објект да не го гледаат профитот пред здравјето.
-Тие сопственици на ресторани не можат да разберат дека здравјето и животот се поважни отколку да земете профит од таа веселба, и за тоа ќе има сериозни санкции. И кога бев претседател на Владата истаканав дека времето на вакви здравствени кризи не е време кога треба да се остварува профит од кого било. Сега е моментот кога сите заедно треба да го сочуваме здравјето и да преживееме и понатаму да создадеме можности економијата да се врати во полн план, потенцира тој.
