Повеќе од 250 милијардери и милионери на состанокот со политичката елита за време на Светскиот економски форум во Давос побараа да се воведат даноци на богатство за да помогнат во плаќањето за подобри јавни услуги ширум светот.
– Нашето барање е едноставно: бараме од вас да нè оданочете нас, најбогатите во општеството. Ова нема суштински да го промени нашиот животен стандард, ниту да ги лиши нашите деца, ниту да му наштети на економскиот раст на нашите нации. Но, тоа ќе го претвори екстремното и непродуктивно приватно богатство во инвестиција за нашата заедничка демократска иднина, рекоа богатите луѓе во отвореното писмо до светските лидери.
Меѓу богатите потписници од 17 земји е и наследничката на Дизни, Абигејл Дизни, Брајан Кокс кој го играше измислениот милијардер Логан Рој во „Сукцесија“, актерот и сценарист Сајмон Пег, како и Валери Рокфелер, наследничка на американската династија, пренесува Гардијан.
– Ние сме, исто така, луѓето кои имаат најголема корист од статус кво. Но, нееднаквоста достигна крајна точка, а нејзината цена за ризикот за нашата економска, општествена и еколошка стабилност е сериозна и расте секој ден. Накратко, ни треба акција сега, велат тие во писмото насловено „Горди сме да платиме“, кое ќе се обидат да го достават до светските лидери собрани во Давос во Швајцарија во среда.
Новата анкета на супербогатите покажува дека 74 отсто поддржуваат повисоки даноци на богатството за да помогнат во решавањето на кризата со трошоците за живот и подобрување на јавните услуги. Истражувањето, спроведено од Сурвејшон во име на предизборната група Патриотик Милионерс, анкетираше повеќе од 2.300 испитаници од земјите на Г20 кои поседуваат повеќе од 1 милион американски долари во инвестициски средства, без нивните домови – што ги става во најбогатите 5%.
Анкетата покажа дека 58% го поддржуваат воведувањето на данок на богатство од 2% за луѓето со повеќе од 10 милиони долари, а 54% сметаат дека екстремното богатство е закана за демократијата.
